انباء نيوز
تناقلت وسائط اعلامية منشور للقيادى بالكتلة الديمقراطية مبارك اردول يتغزل فيه بقوة الطيران الحربي السوداني
وخاطب اردول في منشوره مليشيا قوات الدعم السريع المشتبكة مع الجيش السوداني منذ السبت
وقال في منشوره انه وبحكم خبرته كمتمرد سابق لمن وصفهم بالمتمردين الجدد من الدعامة حسب وصفه بخصوص الطيران الحربي انه لاحل له ولن يجدوا له حلا
واضاف منذ اكثر من عشرين عاما لم يجد المتمردين في السودان حلا للطيران الحربي الا بالدعوات وقراءة سورة يس الفاتحة
حذر اردول الدعامة بعدم اللعب والاستهوان بالطيران الحربي وقال “خلاصة كلامي ما تلعبوا مع الطيران عشرة مرات ما تلعبوا مع الطيران”
وتابع قائلا انتو عارفين نحن لينا أكثر من عشرين سنة وانا شخصيا دخلت الحركة ٢٠٠٣ ومرقت منها ٢٠١٩
وذاد يعني قضيت في التمرد حوالي ١٦ سنة ما لقينا حل كلو كلو للطيران والتفوق الجوي بتاع القوات المسلحة دي كلو كلو
ووقت تدخل المعركة بس تفاجانا بها زي ما انتو حاليا متفاجئيين ، ما بتقدروا ليها اللهم الا بالدعوات وقراءة الفاتحة ويس.
ما جينا الخرطوم ورجعنا من ابوكرشولا وام روابة عشان الطيران .
المدافع اللي عندكم دي ما فعالة للتخفيف من غاراتها ولا بتعمل ليها حاجة لانها سرعة المناورة عند السوخوي والميج سريعة
والمسيرة ما بتتشاف والانتنوف تطير على بعد ابعد من تاثير المدفع حقك بعشر مرات .
، يعني ممكن فرقة كاملة يخلصها ليك ثمانية طيارين عكاليت .
انا شخصيا نجيت من اكثر من محاولة قصف بالميج مرة والانتنوف مرتين طلعوني كورعيني والخندق البرميلي اللي في بيتي .
يا جماعة استهدوا بالله الانتصارات التي حققت علينا منكم كان الطيران يلعب فيها دور ال٧٠٪ والباقي تتموا انت مع الاستخبارات والمدفعية .
خلاصة كلامي ما تلعبوا مع الطيران عشرة مرات ما تلعبوا مع الطيران .
